മാസങ്ങളോളം ആശുപത്രി കിടക്കയിൽ വേദനയും അനിശ്ചിതത്വവും അനുഭവിച്ചിരുന്ന ആന്ധ്രാപ്രദേശ് സ്വദേശിനിയായ 54 കാരിയായ ഇന്ത്യൻ പൗരയായ സുബ്ബ ലക്ഷ്മുമ്മ ഒടുവിൽ ഈ മാസം 22-ാം തീയതി വെള്ളിയാഴ്ച ബഹ്റൈനിൽ നിന്ന് ഇന്ത്യയിലേക്ക് മടക്കയാത്ര നടത്തുന്നു. മാനുഷികതയെ ഉയർത്തിപ്പിടിച്ചുകൊണ്ടുള്ള ഈ ദൗത്യത്തിൽ സാമൂഹിക പ്രവർത്തകർ, മെഡിക്കൽ സ്ഥാപനങ്ങൾ, സേവന സംഘടനകൾ, നയതന്ത്ര പിന്തുണ, സന്നദ്ധ പ്രവർത്തകർ എന്നിവർ കൈകോർത്തതോടെയാണ് ഈ മടക്കയാത്ര സാധ്യമായത്.
സുബ്ബ ലക്ഷ്മുമ്മ വീൽചെയർ യാത്രക്കാരിയായി സഹയാത്രികനോടൊപ്പം ചെന്നൈ വിമാനത്താവളത്തിലേക്ക് യാത്രതിരിക്കും. അവിടെ നിന്നും ആന്ധ്രാപ്രദേശിലേക്ക് ആംബുലൻസിലൂടെ മാറ്റി തുടർ ചികിത്സയും പരിപാലനവും ഉറപ്പാക്കിയിട്ടുണ്ട്. 2025 ഒക്ടോബർ 14-ന് ഉണ്ടായ ഗുരുതര റോഡ് അപകടത്തെത്തുടർന്ന് ആശുപത്രിയിൽ പ്രവേശിപ്പിക്കപ്പെട്ട സുബ്ബ ലക്ഷ്മുമ്മ ഏറെ നാളായി ബഹ്റൈനിലെ ആശുപത്രിയിൽ ചികിത്സയിൽ തുടരുകയായിരുന്നു. പ്രവാസി ലീഗൽ സെൽ (PLC) ഗ്ലോബൽ പിആർഒ ആന്റ് ബഹ്റൈൻ ചാപ്റ്റർ പ്രസിഡന്റ് സുധീർ തിരുനിലത്ത് നടത്തിയ ആശുപത്രി സന്ദർശനത്തിൽ രോഗിയുടെ അവസ്ഥ അതീവ ദയനീയവും ഹൃദയഭേദകവുമാണെന്ന് കണ്ടെത്തി.
രോഗിക്ക് സംസാരിക്കാൻ കഴിയാത്ത അവസ്ഥ, ഗുരുതരമായ നാഡീവ്യൂഹ പ്രശ്നങ്ങൾ, വീൽചെയറിൽ പോലും സ്വതന്ത്രമായി ഇരിക്കാൻ കഴിയാത്ത സാഹചര്യം എന്നിവ ശ്രദ്ധയിൽപ്പെട്ടു. തെലുങ്ക് ഭാഷ അറിയുന്ന വ്യക്തിയെ കൂട്ടിക്കൊണ്ടുപോയിട്ടും രോഗിയുമായി അർത്ഥപൂർണ്ണമായ ആശയവിനിമയം സാധ്യമായില്ല. അപകടത്തിന് ശേഷം ഉണ്ടായ സ്ട്രോക്ക് രോഗിയുടെ ആരോഗ്യനില കൂടുതൽ ഗുരുതരമാക്കിയതായി ആശുപത്രി അധികൃതർ അറിയിച്ചു.
Content Highlights: A team of social workers in Bahrain supported an Indian woman who had been undergoing treatment in a hospital. With their assistance, arrangements were made for her safe return to India, highlighting the strong expatriate community support network in the country.